B隊的啦啦隊

梁根源

  做得啦啦隊,目標明確,不理大會細會,只要球隊落場盡力,輸贏無計,一樣開心。若如二月尾香港隊對台北一役,足球界事前上下一心,準備充足;網 民在網上一早呼召入場,現場五千香港球迷,都投入做曬港隊的啦啦隊,玩曬人浪;而新教練戰術部署出色,球員表現對板,結果主場大勝,熱愛香港足球的朋友, 一定會對港隊寄託更大的希望。

做啦啦隊最無心機的,就是球隊士無鬥志,死下死下,不要求球隊上下革新幾稀矣。以前以為這樣的情況,已是最慘情,卻世事難料,局局新鮮。

若果追隨了三十年的球隊,不知何時,竟已變成了人家的B隊,就真係情何以堪。那隊A隊,就算係猛如曼聯、巴塞、皇馬,是眾人至愛, 皇者之選,都終非所願。一則當日選擇撐那一隊,自有各人的道理與感情,豈能在未情願下,強要人將愛護之情,自動轉帳;二則世界強隊林立,既正派,又好波 的,都不單只有你那一隊A隊,要揀都大家研究下先好喎,誰知驟然就變成了人家的B隊,真係搞笑。

傑志可以巴塞化,南華可以同熱刺建立合作關係,只為提升球隊實力,從不損害球會的獨立自主地位。降格做人家B隊,又何必呢。